Općina kontra komunalnog

0
348

Iša sam u pekariju vazest koji karcinom od spize, jer ne va kafa na debulecu.


Kad tamo jedna šmisnica iz općine kupuje mašur spize. Odma me oni Amor probuža s jubavnim ostima, već vidim da jemamo puno toga zajedničko. Pod očale sam baci oko i bome dobro je nasađena, sve utvrdo. Jušto sam iša vazest par hrenovki u bublici, kad eto ti Lovre Debelogusca iz komunalnog. Di si, ča si, homoća na kafu. Molaj me Lovre, jemam ritku bakteriju, biž ća. Oću ga škartat da mogu za Općinarkon. Vraga on zna ča je bakterija, pa me potega na kafu špjegajuć obo kontenjerima i kartušini. Naša me ka puha sa lampadinon, nisan se stiga škapulat.


A Općinarka sila dva stola dalje i ugrizla buhtlu ka da je sudnji dan. Ajme koje rajske liposti. Ma ne mogu sad nju zvat za stol jer se općina i komunalno ne podnose, a Debeloguzac se ćapa brontulavat. Od silne vodurike ča mu gre na usta propja me leša.
I onda šok. Općinarki došla ekipa, njih šest iz općine. A meni bilo teplo oko srca vidit da šinjorina uzima mašur spize za se, kad ono jema puno just za napunit. Ka mi je niko izvadi rajski zalogaj vitalca iz just, ali govorim si, kusat ću i dalje jerbo je šinjorina beleca ka trica baštoni, a ja sam uvik as.

A onda drugi šok. Poče se Lovre beštimavat sa Fabom Nosonjom iz općine. Udrila barufa općina protiv komunalnog, svi protiv bidnega Lovre. Ja diga drob u prsi i “ala dosta!”, a pol hrenovke mi ispalo iz just. E onda sam se najidi jer kad mi ispadne čagod iz just to je svetogrđe. Nabroji sam i općini i komunalnon sve ča hi gre i reka da ću išekat septičku i svima sve to stumbulat u vrtle. Čekan kanalizaciju ka ćelonja vlase, nikako doć do mene. S ono pol hrenovke sam potega Nosonju u nos, jerbo ga ne možeš falit ni da hoćeš.
U silnoj barufi mi je drob ispuza ispod majice, parilo je ka da sam proguca bojler. Lovri Debeloguscu sam da nogu u guzicu jer mi je izbi šporkin balotama Općinarku, mada je sigurno ni oćuti jerbo mu se od debeline ne možeš probit do živac. On govori da ča sam mu kriv, da je on samo kontra općine, a da za koga sam ja. Ja sam za Općinarku, jebala vas općina.

Kad je kalmala barufa, govorim Općinarki da ako je treba ispratit do općine, javijen se dobrovoljno ka nezavisni kandidat. Govori da je jedinajst uri i da u sto metri je neće snać veća muka od mene.
Pari mi se da je vo dobro pasalo, bolje da joj je i muka od mene, nego da me ni ne vidi. Pensan da će bit čagod drugom neprilikon.

LEAVE A REPLY

Please enter your comment!
Please enter your name here