Nauka o nadimcima

U malin mistima nema puno pardona za fizičke ili moralne slabosti. Ono ča si će te i uresit, dobit ćeš nadimak po miri. Tako će čovik s velin ušima bit Dugouško, a onaj se velin noson – Nosonja. Ko slabo vidi će bit Očalinko, ko cota će bit Coto, ko je pogrbljen će bit Gobo, a ko ćepeka – Ćepekalo. Ko prazni jame će bit Govnar ili Fekalon, a ako ćemo veće po gospodski, biće profešur od govan, ili inženjer od litavice. Puno debeli čovik će bit Bahić, Karatil, Maona, Mih, Debeloguzac. Gay čovik će bit jednostavno Peder. Ako si Bosanac, dobit ćeš nadimak po onemu ča činiš – Pero Zidar, Rudi Keramičar, Meho Pitur. Ako si doša u malo misto nakon puno godišć vanka, onda se zoveš po bandiri – Jere Švicarac, Nikša Holandez. Ako si puno godišć študira, zauvik si Študent. Ako si pošćer, možeš biti samo i jedino Pošćer i to poništaje sve druge nadimke. Tako je i sa panduron, mesaron ili grobaron.

U malom mistu sve je naopako pa je tako manovalski posal pun doturi, meštri i profešuri. Oni koji radi u zelene i zalije palme je inženjer. Ko kupi smeće je meštar od škovac, a ko vežije trajekte je inženjer od cime. Oni ča prodaje vrduru na pijacu je dotur od vrzota, kapo od fažoleti. Ako kojin slučajen ni dobi tako akademsku titulu, onda ga se zove po vrduri – Pomidor, Petrusimul, Kumpir, Kapula, Kupusar. U nas ča je dičnije zanimanje to si veći lupež i danguba, a ča je prostiji posal to si veći dotur i inženjer. E.

Ako ti se dogodila nika dežgracja pa se ukazalo da te čagod slabo gre, to te prati cili život. Ako te šinjorine nećedu, onda si DonŽuan ili Kazanova. Ako plivaš ka sikira onda si Dupin. Ako nimaš sluha jer ti je tovar prni u uho, onda si Pavaroti. Ako si lud u glavu i pišeš pisme i štorije, onda si Cesarić ili Servantes. Za slučaj da si najgori na balun, svi će te zvat Maradona. Ako si se stuka sa kultivatoron, ne možeš uteć da te ne zovedu Lauda.

Ako butaš rič sa sela (ili iz drugog mista) u malom mistu kad si u viziti, postaješ ta rič. Tako si Tonka Gvanćera, Fabe Patakenjac. Ako te snimala televizija, a fali si rič, postaješ ta rič. Ako je bi gust promet i reka si na televiziju da se učini grop, onda si Jozo Grop.

Nevoja te snašla ako ste blizanci, avancat ćete skupnu nadimak Dva Jaja ili ništor slično obo jajima. Isto tako ako ti je stariji brat Praskva, ti bi moga bit Nešpula. Ili ako je on Dinja, tebe toka Cata. Na nesriću, ako ti je otac Telac, ti si Telić. Može ti se dogodit i da ti nadimak avanca. Recimo zovu te Karota, a ako oženiš ždribicu ča govori ekavicu onda te prekrste u Šargarepa.

Eto tako vam to gre u malo misto. Sve činimo naopako, a kako cila država gre ukrivo, možda je vo naše dobro nasađeno. U nas se čovik ne ulipšaje besidon vengo baš kontra ga se maškaraje i čini još betežnijin nego ča je.

Libar: Frnjokule Šjor Farabuta