Regule za prvi randevu

Farabut je obično vanka regule, znači zna sve ča ne valja! No kako u mistu jemo puno onih ča iškedu ženu, evo par reguli da im se najde pri ruci kad gredu sa šinjorinom vanka:

1. Oper se, jerbo njuše bolje od švapskih ovčari
2. Bac dva bićerina mušća pod pazuhe
3. Bac još dva bićerina mušća pod pazuhe
4. Ostriž nokte, jerbo vidi ka sokolić
5. Glum da nisi cukun
6. Ako ćeš je zvat na piće, računaj da šinjorina ni đogadur s balotih i da ne triba istrest demižanu u sebe
7. Ako ćete jist vanka, računaj da perun i žlica nisu ukras i da ne treba s rukam kusat
8. Da nisi izi šest kutli fažola ka doma
9. Ne govor punih just i ne pljucaj koščice prima njoj
10. Ne gađaj konobara krpom, a istu ne vezij okolo glave, jerbo još ni pir
11. Ne rutavaj, ne mora zna da si bariton od spize
12. Ako ćete poć u đir, ne tuljaj se ka muzgavac i ne hizaj
13. Pazi da ne pasa priko drače, nisi na ložju
14. Ako sednete na šentadu, nemoj blesit u nju nego gledaj u zvizde
15. Ako ima rećine, ne čin joj frnjokule
16. Ako je sela na hladno, nemoj joj reć da će dobit upalu prostate
17. Ako se triba jubit, zatvor oči, otvor justa i ne bali
18. Ne griz, nije šinjorina panceta
19. Ka pravi farabut poj krest trišnje za nju, ali da je nisi gađa sa cabla
20. Ako ćeš je zvat doma, ubij sve vonje ča su bili nase 15 godišć, jerbo ćuti veće nego ultrazvuk